Декабрĕн 18-мĕшĕнче Вăрман-Çĕктер ял тăрăхĕнчи Çÿлтикассинчи пĕтĕмĕшле пĕлÿ паракан вăтам шкул юбилейне паллă турĕ. Республикăри чи ватă шкулсен йышĕнче вăл.

Шкулăн илемлетнĕ акт залне, ачасемпе вĕрентекенсем, амăшĕсемпе шкулта вĕреннĕ аслисем тата сумлă хăнасем тулллиех пухăнчĕç. Уява биологипе хими вĕрентекен Татьяна Волковăпа обществоведенипе истори вĕрентекенĕ Алексей Мочалов ертсе пычĕç. Сумлă хăнасен йышĕнче: Шупашкар райадминистраци вĕрентÿ пайĕн пуçлăхĕ Борис Романов, Вăрман-Çĕктерти пĕтĕмĕшле пĕлÿ паракан вăтам шкул директорĕ Шейхулла Феизов, Çÿлтикассинчи Владимир чиркĕвĕн настоятелĕ Феодосий атте, ЧР краеведсен пĕрлĕхĕн председателĕ Сергей Сорокин, Салапайкассинчи пĕтĕмĕшле пĕлÿ паракан шкул директорĕн çумĕ Светлана Ильина,шкула саламласа парнесемпе чысларĕç.

Чи малтанах сцена çине шкул çумĕнчи Кристина Семенова воспитательница ертсе пыракан ачасен ушкăнĕ тухрĕ. Чи пĕчĕк артистсем çĕнĕлле , тумсемпе «Çарăк» юмах лартса пачĕç.

Унтан Хыркассинчи Антонина Лукина ертсе пыракан «Тивлет» тата Çÿлтикассинчи Светлана Мартьянова ертсе пыракан «Калинушка» ачасен пултарулăх ушкăнĕсем те хăйсен юрă-ташшипе савăнтарчĕç.

Николай Смирнов, Атăлъял